Panjuk "TAJU" Remaung enggau balas Danjan

Kepuas ke bejalai, sida pan datai ba kaki bukit kenyalang. Enda jauh ari nya diak ai sungai Mali sereta dalam ai nya mayuh ikan enseluai, buing, kenyulung enggau ikan bukai. Enti benasib, suah mega sida bulih ikan besai. Lapa dih, sida Nyaing enggau Apung pan belabuh ngasu. Ke ulu, ke ili peda bisi amat bekau pelanduk. Ke ulu agi, bisi agi. Peda enda berasai bejalai kin kia nyau lucak bekau tanah ditujah sida. Asaika enggai mih sida pulai.

Nyau bebungai asai ati. Benung bepilihka jelu ka disumpit, ka dipanjuk, ka ditikau enggau sankuh, dia siku antara sida ke benama Lungga Labi lalu bejaku, “Wai...nyau begeriuk perut aku. Tak enda ulih tat. Pulai dulu aku.” Amat ga tudah tuai, ketegal ke menawa lelabi, nya mih nangi takutka menawa lelabi nyau mulan tauka datai baru. Akih tu menawa mimit pemedis ia ari urang bukai, enda sebaka, laban kudah makai ludah lelabi menawa sereta bulih belama lelabi. Pia mega utai diketup ia ba nyawa, putus magang. Nya mih ia dikangau ka urang Lungga Labi.

     “Au, dulu mih nuan akih. Jimatka bejalai. Kami nitih dudi. Kami tu agi deka ngasu. Bisi endar sida jelu ditu,” ku Apung nyaut. Iya endang lama udah nemu penusah ke nuntung kaban iya Lungga Labi. Ari mit nyentuk ka besai, nadai kala beserara baka isi enggau kukut. Anang ke nyadi mayau engau ukui pan enda kala, nadai kala besengki jaku belaya enggau pangan diri.

"Au" ku Lungga Labi. Udah madah, iya lalu mupuk bejalai. 

     Maya bejalai, dia Lungga Labi datai ba kerangan siti. Dia iya tepedaka lauk, asi enggau buah nyau bekechinang mayuh bendar baka ke diaraka orang ti baru pulai bumai enggau bekebun ba atas kerangan enggau ba tanah nya. Enda chechamang tudah Lungga Labi lalu nyengkau asi enggau buah. Dipakai sereta diak buah dikupak iya sigi buah sibau lalu dikanit. “Nyamai” ku iya bejaku kediri berandau nengali.

Mapar aja umbang enggau leka asi ba atas kerangan enggau tanah. Laluh buah sibau dibai Lungga Labi pulai ke rumah. Ieka buah sibau ditepu ia ba pemansai lalu iya ke agi bepating diengkah ba bau baka ke ngesan lumpung kayu.


     Datai ba rumah panjai, indai Lungga Labi tekenyit meda anak iya pulai mansai enggau ngasu mai buah sibau laban maya nya ukai maya buah. “Parai kitai! Dini nuan bulih buah sibau mansau nya Jang? Diatu ukai maya buah. Alit bendar ati aku. Nyau ukai lelabi tauka jelu ke dibai nuan tang buah sibau. Kada enda taju remaung dibai nuan tu. Iga nuan bangat enda ingatka ajar niang inik nuan suba. Badu nuan makai utai sengapa,” ku indai iya bejaku nganu tudah Lungga Labi. 


     Nama dih, Lungga Labi tak semina kekesap aja. Asaika dipandam orang dada. Tekelalu kesal. Nesal laban enda berunding dulu sebedau ngereja pengawa. Amat ga tudah nyawa, bangat bam. Jari jampat amat ngambi utai orang. 


     Indai Lungga Labi endang sigi indu ke beberita sikar lebuh ngereja pengawa. Betesau mih tudah tuai ngagai sepintu-sepintu bilik. Bebai ngaga duri pintu menoa (KUTA). Tiga puluh serak pintu menoa (KUTA) digaga sida serumah. Enda nganti ke apus hari sehari nya, dinga udah bekedui nyawa indu nyabak ari dalam bilik. Bekedanja derap kaki bala sida ke indu enggau anak mit sebelah ruai nuju bilik sida Lungga Labi.

Ba tanju belakang rumah, laban empai tembu empang kuta digaga sida, diak Lungga Labi bekerajai tubuh berekak enggau anak Remaong nyau bebesai. Diak Lungga Labi semina ngena tubuh puang ngelaban Remaong nya, enda beduku, enda beterabai tauka sangkoh. Laban diengkah ia ba ruai din magang keresa ia. Nyau kelama, nyau lemi tudah Lungga Labi, nyau nadai daya ka ngelaban. Nyau ambis rajai laban Remaong. Pia mega tunjuk jari Remaong ambis putus sepiak, laban diketup Lungga Labi. Nyau alah meh tudah Lungga Labi tu tadi, tegaring. Laban Remaong. Peda tunjuk jari Remaong ke putus nya tadi bebali nyadi tanduk beduri.


     “Nama utai bangat dikebegauka kita uchu,” pia ku Tuai Rumah ti baru pansut ari bilik Uchu ngau Ichit wit ia.


     “Lungga Labi aku. Udah nadai,” pia ku saut anak mit siku ka benama Umang.
     

     “En...dai. Kini penunga iya. Nama iya enggau sida Nyaing enggau Apung mansai enggau ngasu tadi dih,” Palui kita tu. Nadai ibuh dikebegauka nya. Udah nurun mansai iya,” ku aki Tuai Rumah majak ka penemu iya. 


     “Ukai pia aki. Lungga Labi udah dibunuh remaung. Pala kena pumpung. Parai! Taju remaung,” pia ku anak mit nya. 


     Nya mih Tuai Rumah lalu dedui nyabak baka anak mit ngenang pemarai Lungga Labi Bujang bungas sida serumah. Mati nengali hari, parai nengali lemai, . Bangkai iya lalu disenggai. 
Bisi siku menyadi bujang Lungga Labi ke benama Danjan deka bebalas laban ti kasih meda bangkai menyadi iya enda bepala. Dia iya ngasuh sida serumah bedayaka iya lalu enda ngasuh nganjung bangkai menyadi iya. Semua engkerabun, ubat pengering tubuh, dinding bulu sida serumah ke bisi disimpan sida serumah abis diunsut ba tubuh Danjan. Danjan lalu bepasuk baju, betangkin ke duku ilang. Akai daiiii..... bula orang indu enda tekait ati meda penyigat Danjan. Naka pengering-ngering tubuh Danjan ngena ngepan kena ngayau. Ngayau remaung.


Danjan lalu nurun bejalai nitihka pemai kaki. Nyau kepuas ke bejalai meraka sungai, nurun bukit, niki bukit sepiak datai mih Danjan ba menua siti. Dia iya tepedaka rumah orang. “Kada enda tu, rumah Bunsu Remaung ke digiga aku ngelamatu,” ku Danjan bejaku kediri. Nadai orang ninga. Dan ensurai ke endur Danjan nyandih nyau beteguyat dipuputka ribut baka ti madahka nya mih rumah Bunsu Remaung. Danjan duduk ba bandir kayu nya lalu ngunsutka ubat mali ba semua tubuh iya. Udah nya iya lalu nyapa orang ti bisi ba rumah ka baru udah dipeda iya nya tadi. 


     “Jadi rumah kita?” pia ku Danjan.


     “Jadi, alu mih niki. Nama nuan laun endar datai. Kami ditu benung naku antu pala ulih aku di menua sepiak din.” pia ku anak Bunsu Remaung.


     “Endang ia tu munuh menyadi aku. Lagi dik. Gamal dik jai. Empai nemu dengah aku dik nya,” ku Danjan dalam ati. Danjan lalu niki ke rumah. Duduk. Iya dinahka ai tuak enggau utai empa bukai. Siti nadai mih diempa iya. Mata seruran engkining antu pala ka benung ditaku bala indu remaung ba puak ruai Bunsu Remaung. Enda berasai labuh ai mata nelusur kuyu chelum manis iya. Ati seruran sinu ingatka pemarai menyadi iya.


     “Lapa mata nuan wai tak belai?” tanya anak Bunsu Remaung ke madah penama diri Mali meraka tunjuk udah nadai, enti agi bedau tau serang, bejuluk nyadi tanduk beduri enti ditaruh. Pia ko anak remaong nya bejako.


     ”Eh...laban tepuk asap orang ari setak nyin,” saut Danjan. Nasib bendar bisi asap kepul-kepul enda balat sebelah ruai bekau orang berapi ngena api kayu. Hari maya nya ngalih lemai. Maya indu remaung bepandukka asi enggau lauk.


     Malam nya, rumah Bunsu Remaung richah rami. Sida ke nemu bepantun lalu nyadaka pantun diri. Sida ke nemu bekuntau nyau mantaika bungai pencha, betempapka papan enggau pah. Danjan bebungah enggau bala remaung lalu numi sida enggau ai tuak. 


     Tawas hari, peda betelakak bala remaung gali laban udah kelalu mabuk. Nyau enda teangkatka tubuh diri. Bejalai pan nyau tepawir. Semina anak Bunsu Remaung ke bedengah pala Lungga Labi aja agi regas. Danjan pan lalu berunding, ngiga akal. Berundingka chara munuh anak Bunsu Remaung nya. 


     “Aram akih. Nganjung aku pulai dik. Aku nyau enda ingatka jalai pulai ke menua kami. Nguluka aku nuju Bukit  Kenyalang pama mih,” pia ku Danjan.


     “Au mih...Akih ! Nganti ditu dik, aku ka beradu,” ku anak Bunsu Remaung.


Tinggal siku nya tama ke bilik, Danjan berumban ngambi pala Lungga Labi ka digitang ba tiang tengah puak ruai. Pala nya tadi lalu diengkah iya ba temilah. Enda lama udah nya, anak Bunsu Remaung lalu datai. Seduai lalu bejalai nuju Bukit Tinggi. Kira ngalih hari, seduai lalu datai ba tuchung bukit kenyalang.


     “Apu,mayuh amat kara enggau buah sibau ditu unggal,” ku Danjan
     “Dik ka makai buah? Lagi aku ngambika dik,” ku anak Bunsu Remaung.


     Anak Bunsu Remaung ka enda nemu dalih iya lalu niki ngulih ka buah ke bisi dia. Tembu nya, anak Bunsu Remaung buah sibau lalu dipangkil iya. Maya iya kusir-kusir makai buah, Danjan ke endang udah besedia ari tadi lalu negah ngenyit ka mumpung pala anak Bunsu Remaung nya. 

Diak anak Bunsu Remaong nya semina nyebut munyi tu. "Auk mih Akih, nya ka nuan. Aku nemu nuan ukai rang sengapa maya datai berami ba menoa aku, aku segi udah nyium bau nuan, enda sebaka bau kami. Sebedau nuan ngunsut penemu nuan nya tadi. "  pia ko anak Bunsu Remaong nya tadi. Diak Danjan Tuchum aja, bejako dalam ati muyin tu. "Pama ga idung ucak tu, kumbai aku enda ngadang." pia ko munyi jako dalam ati Danjan tadi.

Seduai ia pan alu bepencha, bekuntau bepantap. Peda ambis sama tumpul duku dikena seduai ia ke bepantap, nyau kelalu lama ke bepantap, sama bela putus dua duku seduai ia, nya tepelanting jauh kelangit kin duku enggi anak Bunsu Remaong. Duku enggi Danjan kelalu jauh tebeleka pegai ia laban putus ujung, dipeda ta nyelaie duku ia ke tebeleka nya tadi nyadi ular buntak nelusur ngerayap nuju pun kara. Alu nyadi batu. Diak seduai ia sama bela enda memunyi enda lama, laban meda utai nyelaie nya. Amat bisa ga penemu sekeda urang di rumah panjai nya. Diak ta alu dipumpung, tepelanting pala nya tadi ngagai madang kara. Nyau tekeching darah pansut ari rekung anak Bunsu Remaung. Meda diri ka udah tebunuhka anak remaung nya, Danjan lalu manjung. Naka penginggar munyi nyawa Danjan manjung gaga. Parai mih anak remaung nya. 


     Udah nya, Danjan lalu bejalai pulai nuju rumah panjai sida ti dikumbai menua Ulu Sungai Menyan. Bisi kedua ngangau ke menoa nya Keruntok Tanduk Batu Beduri mayuh duri Remaong ke bebadi didengah urang menoa nya, Danjan bejalai kenu iya enda ngetu-ngetu. Babas, duri, tunggul endang ditujah magang. Datai di rumah, pala Lungga Labi alu ditampung baru ngagai tubuh Lungga Labi. Diunsut indai iya chekur pulai, jerangau pulai enggau utai pulai ti bukai. Enda lama udah nya, kekebut kaki jari indu nya. Peda kekebut luak ati. Peda nyau angkat!


     “Sapa ti ngenanika aku tinduk bemimpi. Sapa ti ngerak aku tinduk jenak,” ku bujang nya bejaku dalam pua kumbu. Kerebakka orang pua kumbu. Jang alu angkat lalu merap indai iya. Udah nya sida serumah ka bisi dia lalu ngerandau Lungga Labi. Tudah Lungga Labi lalu nusui diri dibai orang ke menua bukai. 


     Pap! Munyi semetap. Dinga tachuh bala remaung di luar kuta tiga puluh serak ka digaga sida. Seninjik bendar menyadi bujang nya tadi ditepu sida serumah dalam kuta tiga puluh serak. Di atas kuta nya dikelalin sida enggau bulu landak. Ati sida endang sigi ngadang bala Bunsu Remaung begigaka anak iya ti udah enggau Danjan.


     “Oh...anang kitai ngelaban anak mensia. Angat tubuh enti dulu mungkal. Ukai salah ia. Aram pulai kitai,” ku Bunsu remaung mai bala iya pulai. Bulu landak nya nandaka sida anak Bunsu Remaong dulu mungkal. Nama dih, anak Bunsu Remaung nya parai tang lelaki nya tadi idup baka selama. 


     Nya mih kebuah kitai Iban enda tau bepungkal sekalika enggau jelu tauka enggau antu. Takutka diri kena puni “Taju” remaung. Enti tetemuka tinchin, marik, duit, buah enggau utai bukai endang enda tau diambi. Ukai semina diambi, dijengkau, dipakai tauka dijapai pan enda tau. Kenu ku orang tuai, dikena nyeliahka diri kena panjuk tauka taju remaung.

Kena nyeliah ka nya ukai semina bepiring aja, tang meh enggau duri limau tauka duri landak. Ditanchang sebelah perabung rumah, ba pintu tauka dibaie bejalai sebelah babas. Ngambi antu nemu, mensia nya lebih tajam gi bulu penemu ia, enti dibandingka antu ka ngachau segi enda ulih kacau ia. Tauka nya bulu landak ditunu, dahnya diunsut sebelah tubuh. Kena ngering ka semengat enggau penemu. Nya aja, ari aku.

Amat tauka enda, utai tu tau bepanggai ba diri empu. Ba aku endang amat, dikena nyeliah ari utai jai. Jerita tu nadai bekaul tauka besangkut paut enggau sesapa. Dikena nyadi ka cguan enggau tenggau lalau pengidup kitai.

Nya aja meh auk, terima kasih.

#KenangLemambang@SarawakDayaks
#kenang-lemambang.blogspot.com
Baruh tu semina gambar pengias aja.