Jerita Igat Tarang enggau nembiak manchal (PEMULAI SEDUAI)

Udah Igat Tarang pulai ari langkau umai, diak ia bisi ngara Bunsu Bubut. Bacha abis auk jerita tu auk.

Udahnya tadi sida benung nyenggai tudah Igat Tarang ti udah parai laban kena pansa utai ko sida. Nyadi pemarai Igat Tarang tu nyelai amai ,udah pulai ari langkau umai ba seberai sungai sida alu niki ke rumah panjai tadi alu kekesah minta sah enda sempat bejako diak ia alu luput tekalanya ba ruai alu jampat sida katuai. Tang enda sempat ngubat tudah Igat Tarang diak sida madah  Igat Tarang tu mati meh tadi.

Mayuh meh orang nyabak ke Igat Tarang tu tadi laban sinu ke pemanah ia ,sereta bala kabukai bepadah kulu kili madah ke sepengabang sida semenua nya tadi madah ke Igat Tarang nya udah lesi. Keno ko orang tuai nusi, pemanah Igat Tarang tu amai besai sereta dikenangi maioh laban ia endang beberita manah ati sereta lempung tulang nulung bansa diri maia tusah.

Nyadi mayuh meh orang datai ngesah pengerabat bala Igat Tarang tu tadi. Pemayuh kaban belayan sereta orang ke ngelala Igat Tarang tu endang amai maioh amai ,nyadi bala sida kelelaki kiruh begiga ke utai ke lauk begiga ke utai dempa bala ke ngesah rabat maianya.Nyadi kaduak ia ngeban santubong mega. Bisi ngempat ari santubong digaga alu ditiki ke rumah panjai enggau piring. Lebuh malam ke nyengai nya tadi bisi siku nembiak mancal amai, ia ngemai repik kayu ke digaga santubong nya tadi.

Diak laban ka nemu meh reti bakani gamal antu sebayan laban ia enda kala meda mina ditusi ensera aja. Diak anembiak manchal nya tadi alu enda pecaya utai bakanya. Diak ia nunu umbang santubong ti diban ba tanah tadi ba api. Seretai ia nya alu bisi abus nya tadi alu dijeput ia alu ia ngunsut abus nya ba senentang mata sapiak sapiak .Empai lama endar pengudah ia muka mata encelak diak tak terkenyit meda antu tak ngerimbai ia ba tanju.Peda ia mua antu besimpi pala sapiak,sereta sapiak ia meda antu indu mega.Ka nyeraoh tudah anembiak nya tadi enda ga ulih nyeraoh mina nyabak aja meh tudah anembiak ba tanju meda pemaioh antu tadi belah tanju enggau ba tanah.

Beguai ia tama agai ruai diak ia meda mensia duduk begulai enggau orang dikelala ia magang tang sida nya udah parai magang suba ko ati ia .Malik ia ke setak diak meda niang apai ia duduk jejangah bendar amai ngirup sereta makai tumpik enggau asi pulut sebayan.Kiak meh ia tadi, ngimbai Niang Apai ia, alu berandau diak sama bela makai. Nyadi pemakai sebayan bisi nyelaie mimit, laban utai ka disangkung enggau utai dianjung kitai ba dunya injau, bisi mega pemakai sida ia empu ba sebayan. Malik ia ba senentang orang ke parai tadi diak ia meda semengat Igat Tarang duduk nyandar ngimbai Niang Aki ia empu sereta nyabak mega .Alu enda jauh ari Igat Tarang meh anembiak nya tadi.

Udahnya diak ia ka luput meda antu Apai Sulang enggau Indai Sulang enggau Niang Inik ia. Raja Sebayan (Raja Runyam) ti nemu bebalik mua mega diak meda Raja Sebayan nya enyau jerar jerar lidah ,lidah ia melit pala ia. Enyau nyabak anembiak nya meda antu melut ke mata .Pengudah mata betunga mata enggau antu nya diak ia malik kabukai enya meh meda pemaioh antu sebayan ba ruai naka pemaioh .Ni ke bisi manah gamal ni ke jai gamal sereta semengat orang udah parai bisi setaun udah tadi agi bedau telego aja ngirup ai tuak sereta makai tumpik.

Pengudah lama mensia ke nyadi semengat tadi begulai enggau orang sebayan (Panggau Sebayan), kedulu agi dipansa menua Bunsu Bubut, diak semengat danjung orang agai Sempulang Gana sebedau ditiki ari bukit pengangkat semengat ke langit .Ba langit meh Batara tauka Ettala (Raja Entala) milih ni bagi sida ia ke tama dunya penerang enggau dunya pemetang. Maioh agi kaduak mensia  muai ai tuak ke tanah makin maioh agi bala antu sebayan majak ngirup mega, bebagi utai dempa enggau utai dirup .Diak nembiak enggau Igat Tarang nya meda ulah orang sebayan majak kisuk begagai bebuti.

Bisi enda lama pengudahnya diak ditegah siku antu alu ngasuh seduaia luput. Sereta seduaia luput diak antu sebayan ngerumun tubuh seduai ia alu duduk ba tubuh seduaia.Enda jauh ari nya bisi manang ngimbai nembiak enggau Igat Tarang nya duduk laban ke mata lansik diak manang mansang agai tubuh nembiak enggau Igat Tarang alu minta sida sarumah ngasuh daun sabang kena nepas antu ba nembiak enggau Igat Tarang nya laban sida sarumah meda seduai nya baka ke parai (luput) enyau sengak sengak laban ditinggang antu sebayan .tang benasit endar mega manang nya bisi ngintu ke seduainya ti ngujung seduai nya berasai lantang seput ti ngujung ia pemado agi ngereja ulah bakanya.

Pulai agai Igat Tarang enggau nembiak nya tadi, enyau malam ari empat seduai ia disenggai diak lebuh pagi ia dikubur (Ditumbak) mega. Sereta pengudah ditumbak mega sereta ulit enggau lumbung ia pen dipadah mega kemaia nyadi sereta malam beserara pen tembu .Laban munya agi sigi panjai ulit,ka sebulan dua lebih ulit diadu laban kenya ngica sida sebilik enggau sida sarumah tadi begulai sejalai ngiga barang pemakai kena ngintu ulit mega,ukai baka kediato mega tau dintu seminggu dua, ambis lama sebulan aja alu ketas ulit laban belanja sepeneka meli ba pasar ukai baka sesuba agi ti tusah begiga ke duit.

Bisi takah sebulan lebih bakanya diak sida sarumah tak alu begau meda dua siku mensia baka gamal Igat Tarang enggau anembiak ti cecuyuk siko bedarat ari penatai pendam tadi.Tesepar bala sida kebukai enggau sida ke indu meda Igat Tarang betungkat pulai nuju rumah panjai. Capuh meh sekayu rumah panjai meda Igat Tarang enggau anembiak nuduk kediri ba kayu ba mua rumah panjai tadi. Diak Igat Tarang nanya nyadi ke enda rumah panjai ditiki ko ia enti nyadi ia niki enti enda ia ka bemalam ba langkau umai ia din ko ia bejako.

Sereta bakanya diak sida kabukai nanya penemu sida katuai mega. Diak bisi siku manang enggau lemambang sereta tuai rumah nurun ke tanah alu ngasuh Igat Tarang enggau anembiak muka baju diak seduai alu muka baju. Pengudah meresa tubuh seduai ia diak sida ia terkenyit tak kah seduaia mehnya sereta pengepan nya pen pengepan maia seduaia mati ke sebulan lebih ke sebedaunya. Meda bakanya alu digaga orang piring ading, seduaia digaga orang langkau ba tengah laman sebedau nganti peniki ia ka ditiki ngena piring.

Pengudah cukup intu diak maioh orang tuai nanya bakani seduaia tau idup baru ko sida ia diak. Igat Tarang nusi ia dejuk bunsu bubut ari tanju ia din laban ia ngumbai bunsu bubu manah bulu sereta bau renggut ko ia.Reti ia bunsu bubut enda rindu semengat ngelesay pendiau ia ti kamah sereta bau but ba sebayan din. Nyadi anembiak nya parai, laban enda pecaya ka antu sebayan bisi, enda pecaya antu bisi ba dunya nyata ngau dunya sepiak.

Jerita tuai nusi sebedau mensia ditiki ke langit kin diak sida ia maioh menua dipansa tang menua Bunsu Bubut sigi dulu dipansa laban Bunsu Bubut tu ka meri semengat mensia ngena pengepan ke langit kin enti pengudah ba bukit tinggi ila. Ka pan udah bepengepan ba dunya injau, deka dipasuk ngepan baru ba dunya sepiak. Pengudah ari menua Bunsu Bubut diak semengat mansa menua tasik besai alu betemu enggau Bunsu Ikan ti nginjau ke semengat ngena perau ti ngujung semengat merau nengah tasik besai pangka gelombang nengah wong betingkah arung mega.

Pengudah nya semengat kitai mensia alu bedarat neresa tinting arung neresa kampung jerung jalai naka pemanah nadai nemu renjan nadai nemu arung ngujung datai ba titi penguji enda nemu renjan ti nuntung ke Bukit Tilong Bukit Begelung Bukit Rarung. Datai ba Bukit Rarung diak semengat nuju kayu pengelepau semengat ke langit diak semengat ngemasuk ke ngepan ia sereta ia dipandi Inik Endu Buri ti ngibun kayu pengelepau semengat ke langit .Pengudah mandi ba sungai tuci ba Bukit Rarung diak tubuh semengat enyau perenching gegenjing alu semengat ditiki ke bala dara tuci sebayan ke pucuk kayu semengat ngujung sitik Api tenggau datai ari langit alu ia niki ke langit kin alu nuju langit.

Diak sida sarumah tegenung ninga utai ditusi Igat Tarang enggau anembiak nya tadi laban seduai tu tadi agi ingat utai ba sebayan din. Ti ngujung Igat Tarang tu labuh ari tanju alu ninggang tanah aja ba sebayan enti ninggang batu anchau. Engka enda ingat utai ditusi Bunsu Bubut ba dunya sebayan. Igat Tarang madah bisi kaduak semengat tadi agi ba sebayan din empai niki laban kaduak ia takut nengah titi penguji enda nemu renjan ti ngasuh sida ngenang pengenyai diri ba dunya nyata mega.

Tarang madah bisi apai tuai ari ulu sida suba ti ngembuan pengaruh munuh orang ti udah parai lama ke udah agi enda ulih niti tangga penguji laban ba diak meh enti orang enda manah ati ka diperinsa dulu niti penguji. (Munuh nadai kebuah, peneka ati, ketegal ka ngulih ka diri dipebasa mayuh sereta minta ditakut mensia mayuh. Tang ukai ketegal bebalas nyaga bala bansa, tanah enggau menoa).

Enti labuh ari nya sigi ba api din meh ko ia. Enti labuh ari titi penguji diak semengat nya bejalai naka pemedis neresa duri, pemetang ,nengah jalai ti bebau but nyentuk rembus ba kaki Bukit Rarung. Datai semengat nya ba datas Bukit Rarung diak diintu manah mega ari sida Inik Dara Tuci tadi alu dibai niki ke langit din.

Ba langit meh petara Entala milih ba dini semengat kitai diau jemah ila .Enti semengat labuh ke ai mega diak sida ia tau pulai ke idup baru tang nyadi anak mit ti diada ke ucu icit peturun semengat ia empu . Nyadi munyi ko jerita aku tu, Igat Tarang kala mati mayuh kali sereta idup lima kali mega tang kelima kali ia idup diak ia kelalu tuai, Kelima ia idup mati diak ka lalek pendiau sereta ia enda tau nego anak mit mega laban ia suah nyenguk sebayan.

Ditu bisi padah antu dalam mimpi maya ngabang meda diri ngesah urang enggau urang ngetas ulit dalam mimpi, lebuh siku mensia nya parai, iya lalu disenggai. Ditu meh urang nyabak nya ngeluluka diri nganjung semengat orang ke udah parai ngagai menua Sebayan di sebayan nganjung semengat orang ti parai disabakka iya nya. Udahnya lemambang tauka urang indu nyabak lalu ngerara kebung langit, lalu serabana tusah ditinggal orang ke parai.

Maya ngenang nya, sida katuai lalu ngerara kesulai, iya nya tanda bala ari Sebayan datai. Lalu ngeluluka sida nya udah datai ba pendai orang ke mati. Diambi sida bala raja sida Niram, Raja Sebayan di pendai renjan, Orang ke datai ari Limban dalam begenenang.

Sida Sebayan pan lalu mupuk nurun mai orang ke mati nya pulai ka Sebayan. Betuaika Raja Niram tuai Sebayan, sida lalu niti jalai pendai, udah nya lalu mansa tembawai lama. Lepas nya sida lalu mansa temuda agi jerami, lalu mansa menua Bunsu Ketupung Buban, menua Burung beragai, udah nya menua Bekubu Banda Bulu Burung Ketupung, menua Bunsu Kedampi, enggau menua Bunsu Buau. Datai ditu baru iya ke mati nya nemu diri parai.

Lalu ngelulu ka sida mansa langkau alai orang beburung. Udah nya lalu mansa menua Indu Antu, udah nya mansa menua anak mati lulus. Lalu mansa jalai Anda Mara enggau jalai Simpulang Gana.

Udah nya bala sida lalu mansa jalai Manang Nyara Ke belian ka bedega nyarang takang. Sebayan pan lalu datai ba jalai rurus ka menua Batang Mandai Mati. Lepas ari tu sida lalu mansa menua Bunsu Dundun Berani Ke tau betenun ninting hari ninting pagi,orang betenun enda ngetu semadi putus tali lumbai pemuntang.

Limpas ari nya sida lalu mansa menua Bunsu Semalau Mukau, udah nya menua Bunsu Burung Tiup Api. Sida pan lalu mansa menua Bunsu Bubut (Bunsu Bubut Dara ke ngemata ka nanga jalai midang).

Sida Sebayan pan lalu datai ba Titi Rawan ke dipangkang endu dara tuyu, ke bejaku tau bejeratan, dipangkang Kumang tukang nyabak nyedan, nya ga Bunsu Bubut Buban orang ke ngibun Titi Rawan.

Angkat ari nya sida lalu mansa menua Burung Raya, iya nya burung ke nganjung asi pana ari menua tu ka Sebayan. Udah nya mansa menua Raja Sera Ganti, menua Raja Selampandai, menua Burung Kuang Kebat, menua Bunsu Remaung, menua Raja Siba Iba, iya nya Bunsu antu ke tau meda menua tu enggau menua Sebayan. Angkat ari nya mayuh mega bengkah menua antu, menua burung enggau jelu, sereta utai bukai ke kena pansa sida apin sida datai ba Pendaie Ai Sebayan ke alai sida mandi.

Udah bala Sebayan mandi, sida ke sabak lalu ngeluluka sida mupuk bedarat ari pengkalan nya tadi ngagai rumah sida. Lebuh ke bedarat nya bala sida mega mansa sekeda menua antu, menua petara nyengkaum menua Indai Bilai Tusu Lanjut Panjai Lempai ka belakang. Ka pengabis iya bala sida lalu datai di rumah, ba bilik penaik ba Sebayan.

Sabak tauka nimang ngasuh sida bala ari Sebayan begau, udah nya lalu bebai nurun ngabang. Lebuh udah nurun ngabang, sida lalu datai ba menua Indai Bilai, Manang Nyara, Indu Mati beranak, Orang Mati Pandak Umur, Orang Mati Makai Tubai, Orang Mati Labuh, Mati Tesat, Mati Lemas, Mati Pangka Peti, Mati Telih enggau mayuh bengkah pemati.

Udahnya, sida mansa mayuh bengkah menua bunsu burung, bunsu antu, bunsu jelu nyengkaum menua Bunsu Belut ke beberita muka Pintu Tanah. Nyadi lebuh Sebayan ke nuntung ba Pintu Tanah, dia lemambang lalu ngeluluka Dara Rambai Geruda meransang orang ke lelaki muka Pintu Tanah.

Tang siku pan nadai meh berani muka. Nya alai dia baru Bunsu Belut muka Pintu Tanah munyi ke udah disebut tadi. Udah nya baru bala Sebayan ngalih ba menua kitai idup tu baka menua Mengalai Ulun Tuai Indai Bilai, menua Burung Belangking enggau menua Bubut. Bala Sebayan lalu mansa temuda ke alai sida bayam bunga tanam dia.

Nya aja meh ari aku, bisi ari aku maie kitak ngenang jerita bukai ke kala nyadi ba pengidup kitai.

Jerita tu diambi maya aku ngenang ke mimpi diri empu nemuai/ngabang ke menua bukai niki rumah panjai urang, nyadi penguji tu bisi maie reti ba aku, nyadi pedara ka aku aja. Laban kasuah endar bemimpi ngabang, nyentuk kadiato enti kitak nemuai kerumah aku, tau betusi mimpi pangan diri auk, rindu ninga mimpi siko siko kitai. Urang din rindu ka kitai, kitai ditu agi ingat ka sida. Enda ngira sida agi bisi tauka udah nadai. Pan kitai bemimpi enggau sida berami tauka utai bukai, semengat kitai rindu begulai enggau semengat urang bukai, agi belala maya agi idup tauka udah nadai (sebayan iban ka ngembuan megai pengarap lama) enda begulai enggau sebayan bukai endur kitai ngetu dulo sebedau niki ka sebayan dipegai (Petara Raja Entala. Ba sebayan tu semua semengat mensia begulai magang nitih ka pilih ngau peminta semengat diri empu).

(Enda semua mimpi ngabang tauka mimpi bukai ditusi (kunsi) ka aku ditu.
Mimpi padah antu sebayan nya, bisi urang dikelala, bisi mega urang enda dikelala),
Semadi madah penama ngau menoa diri. Nya baru sida nemu ari ni penatai bala sida,
Diak sida meda penatai, sama ngenang pengidup diri enggau urang bukai.
Nyadi tu tau enda ibuh meh kitak pecaya auk, kira bula aja meh mimpi aku tu.
Nadai jalai ka ngamat ka jako utai peda diri empu dalam mimpi.
Laban urang enda meda, semina ninga aja.
Penemu ngau runding urang diatu enda baka runding urang kelia,
Alah dibaie kemaya ari, reti runding urang kemaya ari diatu wai.

FB/GROUP : KenangLemambang@SarawakDayaks
EMAIL : kenanglemambang@gmail.com
BLOG/GOOGLE : kenang-lemambang.blogspot.com

Baruh tu semina gambar pengias aja. Gambar aku enggau menyadi aku ba rumah, empai lama (sutting ko ribai) enda nemu nyebut endar, nyebut ngapa aja meh aku. Sama meh dinga. Nya aja auk, anang gesak wai. Madah aja