Jerita Bujang Liba Tusun 19 (Ngenan Panjuk betemu enggau Anak Dara Bunsu Ari) ||

Udah Bujang Liba tembu engkira, ia pan alu mupuk bejalai pansut keruai. Datai ia ba ruai, Bujang Liba enda memunyi. Alu nyau nurun ketanah, udah tembu beradu, enda ngemaie ukui ia. Datai ia din ba Dulu Sungai Menyan, bisi nyau kira menakah setengah ari pejalai ia kin. Menua repa, kampung puang ka siko ia aja jauh dalam kampung puang.

Bujang Liba ngenati diri, alu begaga ka langkau ba pucuk kayu tebelian wie. "Ditu meh aku berengkah ngaga langkau, mayuh wie alai aku melit ka tiang ngau dinding langkau. Legi ngadu perabung, nganti asi udah mansau". Ko Bujang Liba berandau kediri, mut mut dalam kampung puangm.

Diak Bujang Liba ngeleka ka uyut ia ba langkau, sereta mansut ka jani siko kadibaie ari rumah tadi. Dintu alu dilulun ia,seretai asi mansau diak Bujang Liba makai .Udah makai ia alu madam ke api tadi alu dilangum tauka dilamun enggau tanah ngica nadai bekau ia berapi ba diak ngica enda ulih temu munsuh ti terpejuh kia. Diak Bujang Liba ngali kediri ba atas langkau ba pucuk kayu tebelian wie nganti ari pagila.

Diak Bujang Liba mansut ka leka jako munyi tu, " Eh lelak ninga kitak nyamuk, udu ka mansa pending aku. Munyi ai cepuk cepuk ari ulu ke ili, baka anak mit tetumu pagi manchal sebelah ruai, ninga senera aki ini landik amat bepantun, ayas dipeda jauh tang jauh baka ka ditepuk asap kemayang pagi. Embun tau ngasuh pedera, nanda ka ari pbangat angat, enti nadai adat nadai pengarap nadai tuju kemanah tau ngasuh tusah lesi". Ko bujang Liba bejako kediri mansut ka leka jako ia. Lebuh matapanas nurun tindok ke padung ia empu, diak Bujang Liba semampai bejaga enggai tindok jenak enda alah orang ke nyatik utai ia enda didinga datai enda ditemu ari ni pejalai. Malik kiba kanan kebelakang keluan tudah Bujang Liba ba dalam pemetang malam dipancar bulan bertengan nadai ga utai ddinga penatai ngasuh ati rawan.

Mina ribut majak berpuput ,bubut kederut memunyi rerebut ,munyi sumpi pinang baka ke bekenang inggap sebelah batang, tudah Bujang Liba nyandih ba pun kayu alu enda kekebut seraya nganti ni utai bangat ka ngenakut sigi ia bukut enggau ati pedis ngau ati ringat.Nyau kira tumu pagi diak cecuwit kesulit memunyi madah ari pagi,diak burung ruai baka melandai nanda matapanas ka nemuai datai nimpai menua Dulu Sungai Menyan din ,memunyi sida tetuwie nanda ka muka pintu langit ngalih ke mua ari nyau kira dinihari ka pagi diak Bujang Liba terdinga ai cebur cebur ari ulu baka orang benung bejalai ba ai sungai.

Malik Bujang Liba kulu. Diak ia terpeda ke indu dara naka pemajik ngemai sintung bejalai kaki bejalai nuju panjuk detan Bujang Liba. Diak Bujang Liba enggai mantai diri dulu laban ka meda ulah indu dara bajik nya tadi ngau panjuk ia. Datai indu dara bajik ba panjuk ia diak indu dara nya alu muka tali panjuj alu ngabas panjuk Bujang Liba.

Udah ngambi tengiling siko dalam panjuk detan Bujang Liba tadi diak indu alu nyimpan tulang tengiling, kerubung terkuyung enggau kerubung lelabi ba dalam panjuk tadi. Tengiling tadi engkah ia ba sintong dibai ia dahnya ditukar indu dara bajik nya enggau tulang, kerubung lelabi enggau kerubung tekuyung ari uyut dema indu nya tadi. Dah nya indu dara nya alu ngerumpang takat panjuk nya tadi.

Seretai indu dara bajik nya mutus ka tali ginti ngau ngerumpang panjuk Bujang Liba alu engkecit ari atas kayu tebelian wie dinga alu meregum tubuh Bujang Liba terengkah ba ai sungai. Diak indu dara bajik nya tadi nyau gegetar tubuh ia meda orang bangat kering merejuk baka nya. Diak indu dara nya nyau lemik patung ka lari meda penyigat orang bujang baka labuh ari langit nyengala ba mua tudah ia.

Diak Bujang Liba pen baka nya meh meda indu dara nya naka pemajik ngilah pemajik bala indu dara ba menua sida din. Diak Bujang Liba alu nanya sapa penama indu dara nya ,indu dara nya nyau malu malu madah nama diri ti bernama Endu Kumang Bunsu Ari .Alu indu dara nya pen nanya penama Bujang Liba mega alu madah kediri penama ia ga.

Pengudah berkelala diak Bujang Liba nanya ari ni penatai, nama kabuah indu dara nya ngerumpang panjuk sereta nama ga indu dara nya ngabas ginti ia ko Bujang Liba nanya Indu dara bajik nya tadi. Diak indu dara bajik madah kabuah ia kenya " laban Bujang Liba ngetan panjuk ba menua sida ia sereta ngenan ginti diak. Udahnya tau nyadi tuga tajam ti ulih nebak bala nembiak ke bemain ba ai sungai". Ko Endu Kumang Bunsu Ari madah ke Bujang Liba.

Diak tudah Bujang Liba nyau rerangap laban ke temu Bujang Liba ba menua Ulu Sungai Menyan sigi nadai mensia sigi kampung jerung kampung puang. Meda tudah Bujang Liba rerangap diak indu dara nya majak nambah jako ia ,Bujang Liba ka kena ukum laban ngambi keresa senentang ba menua sida ia ko indu daranya ti meri Bujang Liba nyau alit ati agi .Tudah Bujang Liba alit ati ketegal ngelamato menua nya sigi kampung puang ko ia bejako kediri ba ati ia din.

Nyadi laban nemu diri salah diak Bujang Liba nyanggup aja mayar ukum ti sida ia ngukum ko Bujang Liba madah agai indu dara nya. Nyadi indu dara madah ukum Bujang Liba nya ulih dipelalai ko ia enti Bujang Liba sanggup nyadi sulu ati indu dara bajik nya. Genap ari Bujang Liba mesti bertemu ngau ia enti enda ia nusi jerita Bujang Liba tu encuri keresa menua sida ia agai semua orang ila ko indu dara nya mejal Bujang Liba.

Nama agi deh laban Bujang Liba tu bisi ngembuan ati ka ke indu dara bajik nya dambi ke bini tak senurut aja Bujang Liba utai dipadah indu dara nya. Udah saduai bersemaia alu nanggam janji diak indu dara nya tadi nyua ke ia sintong utai dulih panjuk Bujang Liba.

Pengudah gauk enda lama saduai ia alu bedanji saduai pagila ka betemu ba tebing sungai ba diak baru. Nyadi mupuk Bujang Liba pulai kili alu indu dara bajik pulai kulu.

Nya aja auk, aku ka meh pulai kebilik tu. Manduk ai, bisi ari kitai betemu baru meh auk. Ba tusun ka 20 apin lama da agi ka pansut.

FB/GROUP : KenangLemambang@SarawakDayaks

EMAIL : KenangLemambang@gmail.com

BLOG/GOOGLE : kenang-lemambang.blogspot.com

Dipansut : Uchu Beliau (Keling Menyan)

Baruh tu semina gambar pengias aja.

Ngupak buah ba langkau aku, kekasam kitai.