Renong (Jako Buah Kenang)

Kitai Iban mayuh pengingat mayuh adat,
Baka pengerindu enggau penyiru,
Ka dini alai endur tusah enggau senang,
Idup di menua begulai manah-manah,
Biak enggau tuai nusun ensera tau nusi ke cherita,
Berandau enggau bepantun tauka beramban,
Ngambi ka bisi dikenang dikerindu sida uchu ichit dudi ari ila.

Mulut amat nyamai nyebut ati keran amat,
Amat meh dilah nadai tulang,
Amat pen nyau ngemendar endar nyebut,
Nadai meh guna enti enda di pegai jaku semaya.
Enggai nyadi baka lesung nadai alu,
Laban lesung sigi enda jauh ari alu.

Suah disindir maya mansa ngerimbas tudah diri,
Tang meh semina ulih disimpan dalam ati,
Pengerindu ke nuan sigi endang dikenang besari sari,
Nuan aja kumang dikesaya aku berari.

Ukai aku enda ibuh ukai ga madah enggai,
Enti aku nyau bebendar madah ke ati diri,
Engka nuan tau tegepang ati alu ngenyauh ke diri,
Enggaika puntan ngapa pia aja baka jalai repa,
Padam tenggelam pengerindu baka mua ari,
Semaya tua rumbau enda nyadi mansau.

Repa jalai pengerindu baka ambun nadai dipeda,
Enda alah tebas ngena lungga,
Ka pen enda awak sama labuh sama angkat belubah meh tua,
Enggai ga ngempu betaban pia aja,
Ngira pengidup dudi ari enggaika nesal ke ulah diri empu.

Pandak mulut urang engkasak panjai mulut kitai,
Enda diri empu nusi nemu meh urang cherita,
Simpan aja meh buah kenang diri empu,
Anang ngumbai diri enda dikenangi nadai urang ibuh,
Laban aku semampai bisi ba tisi ngerimbai nuan,
Biar ngemudi perau gena jari sarat enggau pengerindu,
Pengerindu ti mina tua aja nadai kedua.


Bah menyadi, nyin leka engkabang labuh. Ka ngaga leka setik aku, ditu aja kitai auk.
ILa kitai betemu baru. Ngi aku udah, ngi nuan agi bakih.

#KenangLemambang@SarawakDayaks
#kenang-lemambang.blogspot.com