Jerita Bujang Liba (Tusun 12)

Diak sida ia pulai ke langkau pengayau sebedau pulai ke menoa Gelong, udahnya Ila, sida ngayau kelangit kin enggau nyamai. Udah nya Apai ambu ia nya Rengayong tauka Apai Tutong alu merap Bujang Liba, pia mega sida Entabai, Guntur, Bujang Lemandau enggau sida pengayau bukai. Udah meda ia datai ba langkau pengayau. Enggi tudah Keling, Gemuring Gading, Laja, Bungai Nuing, Tuai Kayau Tuju Ari Tujuh Mala enggau sida kabukai nyau bedunjungg antu pala ba tempara unggun api alu pia mega enggau bala bansa dayak kabukai.

Bujang Sebalu Ngenang nyau penuh tempara unggun api di isik enggau pala bala sida Remaong Gerasi tadi. Udahnya Bujang Liba, Keling, Guntur enggau Pungka alu mandi nuchi diri alu udah nya makai berlauk ke jani ti dambi sida pengayau ari rumah panjai sida Remaong Gerasi tadi maia ari ka malam.

Keling enggau sida kabukai pulai mandi tadi alu duduk ba langkau sida ia empu tang maioh sida pengayau dayak datai nunga ia alu merap Bujang Liba sebedau berandau manah enggau Bujang Liba. Tudah Guntur enggau Uchu Pungga meda ari jauh aja alu tucum meda Bujang Liba dipebasa bala maioh.

Tudah Apai ambu ia ari Gelong temegah ati laban ngembuan anak ti kering sereta beberita alu Guntur naka pengagit ati ngempu kaban ti cukup meri ia penemu sereta ba ati Guntur, idup mati ia mina bepanggai ba Bujang Liba.

Diak Guntur alu besampi ngajih Bujang Liba nyadi Tuai kayau Nganti Apai Ambu ia tauka Apai Kumang ari Gelong jemah ila. Alu pia mega tudah Pungka enggau Tuai Kayau Sebayan ba ati sida ia din Bujang Liba tu meh Tuai pematak kayau ari Gelong  jemah ila.

Pia mega Sida Laja, Entabai enggau Bujang Lemandau nemu Bujang Liba tu uchu ambu Petara Senggalang Burung alu diambu sida Apai Tutong ia nya Rengayong Menoa Gelong Apai Kumang. Nyadi malam nya bala pengayau ngetat pengelelak alu buntau laban bela ngemata Bujang Liba enggau Remaong Gerasi ke berekak tadi.

Lebuh sida tindok Bujang Liba pen tindok mega alu Bujang Liba bermimpi bertemu enggau Aki ambu ia Sengalang Burung. Bujang Liba tindok ia bermimpi nyelai tak dibai Sengalang Burung niki ke langit alu ia dibai Sengalang Burung agai dunya sebayan. Diak Sengalang Burung mai Bujang Liba ke sebayan penyaie pemetang enggau sebayan pemanah tawas alai mensia dipindah nitih semengat ti ba dunya.

Diak Bujang Liba dibai tama agai sebayan penyaie alu Bujang Liba terkenyit meda semengat Antu Gerasi enggau Mensia enggau orang niti titi rawan dunya sebayan penyaie. Udah saduai pansut ari dunya sebayan penyaie tadi. Udahnya saduai nuju Sebayan Tawas alu Bujang Liba terkenyit meda semenggat Remaong Gerasi Setengah Mensia berbaju bebaju manah bejalai ngerindang ati ba ai terejun. Diak Bujang Liba tadi meda Remaong Gerasi Setengah Mensia tadi tak enda ngelala ia ti udah munuh ia ba dunya.

Diak Bujang Liba nanya ba Sengalang Burung nama kabuah Remaong Gerasi tau tama sebayan tawas alu enda nitih bala ia agai dunya penyaie, diak Sengalang Burung alu madah Remaong Gerasi setengah mensia enda kala dulu ngepun munuh mensia ba dunya tauka langit alu ia manah enggau rakyat ia alu enda sebaka enggau bala ti dulu munuh mensia alu ngasut ia enggau mensia ba dunya.

Udah nya baru Bujang Liba nemu reti sebayan bisi dua Menua. Udah nya seduai ia terebai ke langit pemadu tinggi datai diak, seduai alu nunga Sempulang Gana. Alu Bujang Liba nanya Sempulang Gana nanya nama kabuah sapiak nya balat amat berasap diak Sengalang Burung enggau Sempulang Gana madah enti dayak serakup baru ila dunya ka ancur ketegal bansa dayak udah diperinsa orang bukai ila. Maya nya bala dayak deka beserakop begerempung baru ngetan menoa ari diperinsa urang.

Ba ensera jerita mimpi Bujang Liba nyadi amai nyentuk kediato. Bepun ari nya kitai dayak alu pambar ngelengka ke ajar Senggalang Burung enggau Sempulang Gana ngujung kitai dayak nadai bebasa ke pangan diri agi menya nyentuk kediato. Ari laya Gemuring Gading enggau Jenang Apai Sabit Berkait Ngerakit Bulan Genap Malam diak kitai mensia enyau nitih pengawa orang Panggau Libau sereta ari Gelong pengudah Senggalang Burung nyerah kuasa agai bala menantu ia baka sida Embuas,Ketupong enggau maioh agi.

Bepun ari nya Senggalang Burung enggai kiruh ke kitai dayak laban ketegal pemati Bujang Liba ari ulah kitai dayak empu bingking ati meda Bujang Liba tu. Keno ba ensera jerita Bujang Liba tu, pengudah ia pulai kemenoa ia empu, diak ia dikerindu urang belama, disebut urang nama sereta tebilang dikelala mayuh bansa. Sekumbang ia beberita, mayuh penemu, beberita ngetan menoa ia sereta ngangkat ka adat enggau pengarap lama, nitih ka diajar sengalang burung enggau Sempulang Gana. Diak pengudah lama iya idup tadi. Mayuh sekeda tadi enggai meda ia, sereta deka munoh ia enggau ngerasut urang. Dikumbai sida ia Bujang Liba tu enda patut idup.

Diak sida berasut, "Bujang Liba tu ukai petara ditulong sida Petara ari langit, tang ditulong antu pengaroh aja" diak ari kudi, ninga jako sida pengerasut nya tadi. Burung richah munyi nanda ari kudi ari jai. Diak sida ngumbai " Bujang Liba ngudi ari, ia enda tau idup" . Ba jerita ensera tuai nusi Bujang Liba tu diburu sida laban enda tebunuh ka ia. Diak Bujang Liba besampi agai petara dunya, petara sempulang gana enggau Sengalang Burung.

Oo Petara Dunya, Petara Langit, Petara Raja Sua Sempulang Gana, Petara Raja Aki Lang Sengalang Burung Ngemata Dunya, aku tu Uchu Ambu kitak dibaruh dunya, ngangau ka kitak, Manah aku begulai enggau nuan dilangit, ditu bala enggau bansa aku empu enggai meda aku, sida ka rindu ka adat enggau pengarap ka diajar nuan bisi pechaya ka aku, pechaya ka petara langit, petara aki inik, tang bisi sida kaduak bisi enggai meda penemu aku ka  dikunsi aku enggau sida. Tang sida enggai ninga penemu aku, Diak sida agi ngumbai aku enda meri penemu.

Ba jerita bujang liba tu enda ngemedis ka ati urang tauka diri sebilik, biarpan diburu, laban bujang liba enggai belaya enggau sida, diak iya diau kediri jauh dalam kampung, nyentuk ka ia ka parai ba langkau gagak ia empu, enda lama udahnya sempulang gana datai ngenyit depan ia, alu mai ia kelangit kin. Diak Bujang Liba tu enda tau pulai kemenoa sida ia empu din agi, laban enti ia pulai tubuh ia alu mati tekala nya, tubuh ia udah kelalu tuai, diak Bujang Liba tu dibaie Sengalang Burung enggau Sempulang Gana nampung sida ia di langit din. 

Diak sida leboh malam nya, sekeda ke arap pechaya ka Bujang Liba tu tadi bisi mimpi meda bujang liba dibai sempulang gana, diak Bujang Liba ngasoh sida nya ngetan ka adat sereta pengarap lama, laban sida ka rindu, ngetan sereta arap ka nya deka dikingat ka sida lebuh deka parai ila, laban kitai iban enda ulih enda nengah jalai adat lebuh parai nitih ka ajar sengalang burung, sempulang gana Petara Raja Dunya Entala.

Ba ensera Bujang Liba Udah mayuh meri sida penemu enggau utai ke kala diajar Sengalang Burung enggau Sempulang Gana. Ba kepenudi udahnya baru kitai iban nitih ajar ari Panggau Libau enggau Gelong. Diak Bujang Liba tu keno ensera tuai ia tu mati dibai Petara Dunya Entala, Petara Raja Sua enggau Sengalang Burung". Udahnya ba jerita tuai pemayuh dayak bisi mimpi ari Sngalang Burung tauka  Sempulang Gana madah bado kiruh ke sida dayak agi laban, udah bisi ganti ari ditulong sida uchu  menant sengalang burung burung ke baru, baka ketupong, embuas nendak ianya sida uchu ia tu dikumbai kitai iban 7bunsu petara bebali nyadi burung deka nulong kitai

Pengudah pemati Bujang Liba tu, 7bunsu petara burung tu mih nganti Aki Lang enggau Sempulang Gana ari langit, udahnya kepenudi sekali Panggau Libau enggau Gelong nulong kitai kelia enggau diato. Ba jerita tuai Bujang Liba tu biak belama di langit, diak urang Panggau Libau tauka Gelong selalu nemuai ke rumah ia din enda jauh takah Panggau Libau enggau Gelong sepiak menua rembus entara dunya injau.

Pulai baru ngagai Jerita Bujang Liba ke bemimpi tadi. Diak ia udah nya alu terdani ngenyit laban dejo Senggalang Burung ke tisi laban madah ke ari udah tawas. Diak Bujang Liba duduk dedugau ba langkau pengayau ia empu alu malik ke tisi ia meda Guntur enggau Uchu Pungga enggau Entabai bela ngimbai ia maia tindok demalam. Bala pengayau empai dani Agi, diak Bujang Liba angkat ari penindok diri alu nuju sungai alu meda sida ke indu dara ti kala ditulong Guntur maia malam sida ia ke mabuk lebuh nyaruk diri niki rumah sida munsuh.

Sida indu nya tadi nyau betundi enggau Guntur alu ngunsai tudah Bujang Liba ke ngauk ai. Bertundi ja sida laban rindu bebutik enggau Guntur enggau Bujang Liba tucum tucum malu, udah tembu ngintu alu bebela utai pakai diak sida ke indu alu ngasuh Guntur ngidup ke api kena manduk utai dempa, sekali Guntur nekih aja batu tekih ia diak alu mau naka pengemau api tadi alu sida ke indu alu ngengkah sampau kena manduk utai ke lauk ba tungku batu ti udah digaga sida ia tadi.

Udahnya sida alu manduk asi pulut kedempa bala pengayau dayak ti sida dani negik ari penindok. Bujang Liba ke tisi diak meda sida Entabai, Keling enggau Bujang Lemandau bukai udah dani duduk ngimbai api berkindu alu ngimbai indu dara ke bajik. Enggi Bujang Lemandau alu duduk bejagang ngimbai indu dara ti benung berandau nunga api tadi ,mina sida tiga ke dani alu orang kabukai agi tindok magang.

Diak Apai ambu Bujang Liba alu duduk ngerimbai Bujang Liba enggau Entabai laban sama bela ka bekindu diak. tudah Keling tadi duduk ba nunga Bujang Liba enggau apai ambu ia alu sida sama makai alu berkenang ke pengudah pemulai kayau nya ila.

Udah nya ila nampung baru ensera jerita bujang liba tusun 13.

Terima kasih nuju semua.

#kenang-lemambang.blogspot.com

FB kenanglemambang@sarawakdayaks
Baruh tu semina gambar pengias aja