Jerita Bujang Liba (Tusun 10)

Diak Remaong Gerasi pan alu pansut keruai dah nya ketanju meda nama utai nyadi ba Rumah Panjai ia, diak Remaong Gerasi ke sangkar ulun peda ia samoa sangkar ulun udah terlengga magang. Chukup pedis ati Remaong Gerasi tadi alu nanjal batu lesong ti mesai pemerap ti ngujung batu nya terebai ke langit mingkai laban ditanjal Remaong Gerasi enggau naka pegeringat ketegal dayah munsuh bakanya.

Diak Guntur tadi, sebedau muka ngelepas ke indu dara dalam sangkar nya tadi. Chukup sinu ia meda indu 7iku. Diak ia meda siko indu tenaka naka pemajik, ari sida kabukai, tang amat bajik magang sida nya, beburak magang indu iban ke dikurung munsuh nya. Diak Guntur tadi bisi ati ka ngambi indo dara siko nya ka bini ia, nyau merangap tudah Guntur meda pemajik pemurus ati indu nya sereta pengelemi indu nya, nyau sesabak tudah indu nyabak minta lepas, sida indu 7iko nya tadi, indo menoa sida ia empu din.

Lama udah ditinggal, laban ditangkap munsuh, nyadi sida ari Gelong bisi mimpi anak sida agi idup, ditangkap munsuh leboh munsuh mansa menoa sida ke ngayau suba. Kumbai sida mati keno, bisi keduak ngumbai keduak indo lari enggau lelaki. Keno ko ensera indo ke ka lari jadi enggau lelaki, nemu pulai kediri empu, alu mai laki ia nampil sida serumah deka jadi begawai melah pinang.

Pengudah sida nemu, laban mimpi sida meda anak sida minta ambi, ka pulai, ba jerita anak sida ia tu nemu madah ari mimpi, enti bisi utai enda manah deka nyadi. Sida indo keduak tu bisi ditulung petara ari mimpi, disumpah. Semina ke nda diberi pengaroh.

 Nya meh urang ari Gelong deka bebalas, ka ngambi bala sida ke ditangkap nyadi ulu munsuh, bisi keduak nya tadi dibaie kelangit serak tiga. Pulai agai guntur tadi. Diak Guntur pan alu ngelepas sida ke indo nya, alu mai indo nya pansut ari menoa nya.

Bujang Liba enda bermunyi nyau ngunsut diri ngena aruk baru ngica

Remaong Gerasi enda ngelala ni bagi munsuh ti nyaruk nyadi bala ia. Sama mega bakanya meh Keling tadi ngunsut diri empu baka nya nyaru diri nyadi bala sida.

Nyadi udah Remaong Gerasi enggau bala Mensia Gerasi nyusun bala pengayau ia nyaga menoa diak, Remaong Gerasi alu nganti bansa iban tama. Berlanda Keling ke atas perabung rumah panjai, diak ia meda sida Bujang Lemandau, Tuai Kayau enggau dayak kabukai melulung rumah panjai Remaong Gerasi.

Diak Keling nurun ari perabung alu tama ke ruai dulu, nyaru diri bala Remaong. Udahnya nyeling Keling ari sadau diak ari senawah atap diak ia meda langit nyau baka ke malam laban sumpit ti disumpit enggau sangkoh ditikau terebai nuju rumah panjai munsuh.

Bujang Liba enggai pansut ke ruai laban agi ka meda kayau sida apai ia ari dalam bilik. Peda teraoh mensia bansa Gerasi enggau Mensia Setengah Antu madah diri mati kena sumpit enggau sangkoh buluh ditikau bala iban.

Nyau beserak tubuh kena tusuk sangkoh ti ditikau. Peda Bujang Liba meda Remaong Gerasi, sangkoh enggau sumpi nadai ulih nembus tubuh ia. Kiba kanan jari nepas sangkoh enggau sumpit ti ditempalong bala kitai.

Udah ambis sangkoh ditikau, diak ala dayak alu ngerumpang Pintu menoa Remaong Gerasi. Keling alu pansut ari sadau alu engkecit ke baruh alu belanda ke belakang laban pintu menoa ari belakang enda dijaga sida Remaong bukai.

Mina dijaga Nyumbuh Gerasi ke besai amai nyau ninggi pun nyul. Diak Keling ke pintu belakang diak meda Nyumbuh Gerasi nya benung ngagai ia ari pintu menoa. Bisi 4 iku Nyumbuh Gerasi besai tadi nyau tinggi tinggi memagang sereta bertaring tajam. Kenu ke jerita tuai. Remaong Gerasi tu  suah ngasu antu gerasi ba nisi langit alu bulih Nyumbuh Gerasi Antu alu dempu ia.

Ba ensera Remaong Gerasi tu mensia setengah antu setengah remaong ti tampak rita sereta suah munuh bansa dayak alu suah ngasu bala antu gerasi laban Remaong Gerasi ringat ke antu gerasi ti enggai nulung ia lebuh ngayau.

Pulai agai Keling berlanda alu megai ilang ia alu ngelan Nyumbuh Gerasi besai ti ba tisi menoa, udahnya terengkah ba pala Nyumbuh Gerasi ke besai, Keling alu mantap pala Nyumbuh Gerasi nya enggau naka pengering alu dipeda pala Nyumbuh Gerasi besai enyau putus datai dibaruh.

Terengkah ba tanah alu ka diketup Nyumbuh Gerasi besai ngimbai Nyumbuh Gerasi ke mati tadi tang Keling lancat sereta sikal alu engkecit sereta terengkah ba pala Nyumbuh Gerasi besai nya tadi alu ia mantap pala Nyumbuh Gerasi nya tadi. Udah nya ia mantap pala Nyumbuh Gerasi besai Tadi, Keling berasai tubuh terpelanting ke tisi laban kena keramak Nyumbuh Gerasi besai ketiga ari tisi, ngujung Keling nyau seseput dada.

Ti mensia nadai pengering, sigi carik tubuh sereta mati tekala nya. Tubuh Keling alu terpangka ba kayu alu labuh, diak kaki terengkah ba tanah, diak Keling merung alu berlanda ke baruh tubuh Nyumbuh Gerasi besai ketiga alu mantap Kaki Nyumbub Gerasi nya tadi peda nyumuh gerasi nya alu tumbang laban kaki ia putus ,terkenyit Keling Meda Nyumbuh Gerask Ke siko da alu nerekam ia.

Keling alu nyilat sereta alu mantap jari Nyumbuh Gerasi nya tadi ari tisi tadi Keling alu berlanda agai pala Nyumbuh Gerasi nya alu mantap pala nyumbuh gerasi nya tadi alu teputus.

Diak Keling alu muka pintu menoa belakang, diak pengadang pintu alu putus sereta rebah, alu dibuka ia. Bala dayak sigi udah nganti ba luar Rumah Panjai ari belakang ,seretai pintu menoa alu ditumpu ketuai iban peda alu sedandang pintu munsuh, alu nyeraoh bala iban alu tama ari pintu belakang alu mantap belaban enggau munsuh.

Munsuh Gerasi pan majak mayuh datai,  nama agi deh Bujang Liba pansut keruai alu terjun ke tanah ngena tungkat ia, palu kiba kanan dipeda melebai magang kembai tubuh gerasi, bisi tekena ba pala tepambur nadai pala laban kena palu tungkat, sekali malok alu patah jari kaki munsuh, kena palok ba pala pambur nadai pala. Udah nya keduak Tuai Kayau majak mantap munsuh perawai kiba peda temepur pala munsuh ngelima, perawai kanan alu cawit peda pala munsuh nyau ngepit putus.

Engkecit Bujang Sebalu Ngenang enggau sida kabukai alu tama, alu nerejang peda dada munsuh pansut isi, engkecit Laja mantap ngena sangkoh gerejang peda  munsuh besapit ngelima alu midang lelang, Bungai Nuing enggau Entabai kiba kanan peda mua ke luan nyau majak munsuh bertangkan tangkan.

Datai Igat Mata Leka alu ngentak ke sangkoh ke pala munsuh peda meniga putus tubuh. Berlanda sida Uchu Punggau enggau Uchu Pungka alu nyintak ilang disepu alu diperawai peda pala munsuh alu terebai, kekecing darah ari pala munsuh masah tubuh, semajak balat agi munsuh nempuh majak agi bala iban nyimpung pala munsuh, udah tubuh dirasuk darah munsuh bala iban majak semajak berani nadai utai dikenakut agi laban ka ngetan purih diri ari ke mati dipunas bansa bukai jemah ila.

Diak bala pengayau iban enyau semajak nyepuh mata ilang enggau sangkoh ba tubuh enggau pala munsuh. Keling semampai dulu belama nempuh peda sida dayak kabukai ti Keling dulu sigi  maioh munsuh besepur alu maioh lesi ditaban ari ngemai nyawa nyengai mua ari tungga pemati dinihari.

Ba pintu menoa diak Keling eggau Bujang Liba alu nukup pintu ngena kapak gerasi sekali meniga peda pintu menoa terumpang mendua. Berlanda Bujang Lemandau alu nyeraoh laban mabuk darah munsuh peda bala munsuh alu nekup tubuh Bujang Lemandau sekali tang Bujang Lemandau agi idup agi alu miau kiba kanan ilang peda munsuh parai midang ia ke enda tan alu nyurut ke belakang.

Tuai Kayau Sebayan engau Tuai Kayau Tujuh Ari Tujuh Malam alu megai sangkoh alu ngerejang peda empat, lima, enam munsuh beserak midang. Peda munsuh Majak datai ari pintu menoa kiba diak Remaong Gerasi ngasuh bala ia kabukai ngetan ba puting rumah panjai Ujung, ngambi munsuh enda ulih muka pintu menoa ba tisi.

Ba ujung puting rumah panjai Diak Bujang Lemandau enggau Entabai alu besatup enggau manok sabung Remaong Gerasi ia nya diri menyadik ti beberita munuh munsuh enggau nekup pemuput digaga ari tikai wie besi. Alu bertempuh sida empat naka pemalat alu Bujang Liba engkecit ke tanju setak kiba alu mepat alu ngentak tungkat ngagai bala munsuh ,peda temepur temepak munsuh labuh ari tanju.

Bala munsuh semajak datai, Bujang Liba enggau pengayau bujai meda munsuh atai ari tangga langit nulung sida Remaong Gerasi. Keling ngasuh bala ngadang bala munsuh bisi nulung sida Remaong Gerasi. Meda bakanya diak Guntur alu datai, pulai nganjung sida indo ke langkau sida ngetu kemari, alu diak sida ka indu bisi pengayau nyaga ari Gelong empu, Guntur lu ngemai bala kabukai nyatup munsuh ti datai nulung sida Remaong Gerasi ,alu ngenan sida ba pintu munsuh nganti penatai munsuh nurun ari Tangga Langit.

Enggau ati ransing bala pengayau iban nyeraoh ohaaa ohaaaa. kami ari kita petara ngica kami ulih mumpung pala sida, ko sida bala pengayau nyeraoh. Peda pemaioh munsuh atai nulung baka semut nurun ari Tangga Langit.

Terengkah munsuh ba baruh alu disambut bala pengayau iban kabukai alu betekup nyau terkaoh panjung mensia naka pengingar. Ari pen ujan nanda ke ari nyabak meda mensia bebunuh. Nadai pengasih ati. Bujang Liba enggau pengayau kabukai mansang ke semak agi ngujung datai ba pintu menoa rumah panjai alu ditendang Keling enggau Bujang kayu tebelian mesai pemerap kena muka pintu.Udahnya pintu ba kiba terebai, diak bala pengayau iban ngerempuh pintu, peda Gemuring Gading enggau Tuai Kayau 7ari 7malam. Alu mantap kiba bulih ngelima pala munsuh putus Sekali ,pantap kanan peda besepur pala munsuh nya sembilan sigi dijari .

Tuai Kayau Sebayan alu ngerujak ke semak ngena sangkoh bisi sepuluh munsuh kena ba dada, bisi berdiri parai baka nyumbuh. Diak Guntur, Laja enggau Bujang Liba ke tengah peda tak berdengah naka ke bisi ka ngampir, berlanda Bujang Liba alu engkecit terengkah ba Remaong Gerasi benung mantap bala iban ke bukai alu besatup enggau Bujang Liba alu ditanjar tudah Bujang Liba peda besepai dagu Remaong Gerasi pansut darah.

Seduai ia Remaong Gerasi bepantap ngena nyabur enggau Bujang Liba bepalo ngena tungkat sama enggai pedis telih, sida Bungai Nuing enggau pengayau bukai majak munuh munsuh ke bukai alu pia mega sida Bujang Sebalu Ngenang sida Keling, sigi beberita mumpung munsuh.

Aku pan baka nya meh deka nampung baru ensera jerita bujang liba tusun 11 ila.
Terima Kasih nuju semua kaban enggau pemacha.

#kenanglemambang@sarawakdayaks
#kenang-lemambang.blogspot.com
Baruh tu semina gambar pengias aja.