Tampung baru (Jerita Bujang Liba) Tusun 8

Minta ampun ngagai semua pemacha peninga ditu,

Laban laun mansut ka ensera Jerita Bujang Liba tu.

Ari pan tawas, enda lama udahnya lebuh sida bukai terdani magang diak sida sama bertusi mimpi nya magang enggau pangan diri ngujung lebuh meda Bujang Liba sida ia meri basa agai ia, sereta rindu ka berbakih enggau Bujang Liba, alu pia mega apai ambu ia Bujangsebalu Ngenang nyau rindu ati meda Bujang Liba bisi enggau sida ngayau baka dajih nasib ia nya enggau sida ngayau ke menoa munsuh.

Nyadi maioh bakih enggau Bujang Liba pengudahnya laban Bujang Liba tu pengangkat kayau jemah ila ba kenang mimpi sida tadi. Nyadi lemai diak Bujang Liba madah diri Enggau Keling, dia Guntur pan bisi enggau aja ka nyidik rumah panjai munsuh sereta lebuh sida ninga palu tawak lima kali bergemong panjai nya tanda sida tau nyerang munsuh ari pintu kuta, tisi rumah panjai Mensia Antu Gerasi.

Udah nya ila nyerang pintu depan enggau ari belakang rumah panjai Bansa Mensia Antu Gerasi . Ninga sempekat Keling bakanya diak Bujang Liba enggau Guntur sida kabukai sama Bela ka magang.

Lebuh tindok diak sida bisi mimpi sama bertemu enggau Aki Lang Sengalang Burung enggau Sempulang Gana ti madah ke Keling, Bujang Liba, Bujang Sebalu Ngenang, Bujang Lemandau enggau sida Pengayau kabukai.

Nyadi sida Keling enda tau dulu ari Bujang Liba lebuh sida Pengayau nuntung ba rumah panjai munsuh pagila laban enti sida dulu sida ia ka menang ngayau tang maioh bala pengayau mati, mina Bujang Liba, Urang Gelong, Urang Panggau, Urang Panggau Sebayan, enggau sida ari menoa Tujuh Ari Tujuh Malam aja ke idup.

Ba mimpi Keling enggau Bujang Sebalu Ngenang ia meda kayau sida endang amai menang tang ia maioh sida pengayau ambis lesi peda ia. Lebuh sida terdani baru ba dalam mimpi diak meda Bujang Liba dulu tang penyelai ba diak sida meda rumah panjai munsuh ambis angus sereta ia meda Bujang Liba megai pala Remaong Gerasi bisi tiga itii ti besai sereta antu pala naka pemaioh ulih sida.

Udah nya temejul baru Aki Sempulang Gana enggau Aki Lang Sengalang Burung, ko saduai ia, ni pilih kitak bala maioh, ka mati maioh tang menang tauka kitak menang tang nadai pemati bala kitak enti Bujang Liba dulu. Ukai Keling, Entabai enggau Ukam aja Bermimpi, tang sida pengayau enggau ketuai kayau bukai sama bermimpi bakanya magang.

Guntur, Laja, Pungka dulu agi bermimpi lebuh sida nurun ari rumah panjai munsuh. Guntur enggau sida Laja udah bermimpi bakanya, nya meh Guntur selalu berdamping enggau Bujang Liba laban ia nemu mina Bujang Liba, Keling, Bujang Sebalu Ngenang enggau Tuai Kayau bukai aja ulih meri sida ia menang nadai pemati bala pengayau.

Ngenang Bujang Liba ditarit apai ambu ia Bujang Sebalu Ngenang enggau bakih ia Guntur diak sida sama ketawa aja alu sida bertundi. Lebuh bertundi diak Keling madah agai Bujang Liba enggau Guntur, lemai nya Keling, Bujang Liba enggau Guntur ka mansik ka nyidik rumah panjai munsuh ke lemai nya.

Udah nya lemai sida Keling, Bujang Liba enggau Guntur alu ngunsut diri ngena arang alu ngecok mua diri ngena arang sida demalam alu ngukir diri baka Bansa Menaia Antu Gerasi nya tadi laban ka nyaruk diri bakanya.

Nyadi sida tiga mupuk nuju rumah panjai munsuh,  diak sida tiga ba  jalai diak sida meda maioh bala pengabang Bansa Mensia Antu Gerasi nyau bertawing laban ke mabuk ngirup lebuh ba  jalai.

Bisi keduak bala bujang enggau sida ke dara bansa Mensia antu Gerasi benung gauk meh belah pemendai, bisi keduak belah rantau jalai. Naka pengerami sida Mensia Antu Gerasi tadi maia nya, Lebuh Bujang Liba, Keling enggau Guntur mansa diak tadi maioh meh sida ngemai sida tiga ngirup tang Keling, Bujang Liba enggau Guntur madah diri udah mabuk alu ngaga diri baka orang ke mabuk nya meh sida tiga tadi.

Datai sida tiga ba pintu besai menoa munsuh gerasi, malik Guntur ke pintu menoa munsuh peda pintu menoa munsuh naka peninggi sereta tebal diapit kayu terbelian ngemesai 10 pemerap, tak alit ati Guntur enggau Bujang Liba meda pemintar bansa Antu Gerasi ngaga pintu menoa bangat ngeningi nya.

Keling, Guntur enggau Bujang Liba tama ke dalam kin .Datai din sida tiga alu niki rumah panjai sida Menaia Antu Gerasii. Didinga ketawa lelekai, munyi gerunung munyi tawong munyi tawak ditebah sida ba ruai.

Diak sida tama keruai diak sida meda orang naka pemaioh nya Mensia Antu Gerasi ti benung ngajat, berpantun, beramban, ngirup enggau besempama.

Ngetu ditu aja auk, ila nampung baru jerita bujang liba tusun 9. Terima Kasih

#KenangLemambang

#kenanglemambant@sarawakdayaks

#kenang-lemambag.blogspot.com
Baruh tu semina gambar pengias aja.