Jerita Bujang Liba (Tusun 17)

Diak sida empat tadi berasai gaga ati magang, meda utai nyelaie nya ngasoh sida rindu ngenang utai ti nyadi ba sida empat. Diak sida Lulong, Bujang Liba, Uchu Pungga enggau Guntur tu tadi sama ngenang ajat mensia nyemayar ti ngasoh ati sida bisi geli mimit, taja pia sida enda nangi diau ba menoa nya. Diak ajat sida nya bisi ka melit diri empu, ngetup kaki betempap ka kaki jari peda nyau cecirang penampak maya betempap ka tubuh diri empu, ta tampak ruai nya laban ajat sida nyemayar. Kaki jari ambis nadai diketup, udahnya nemu bebali nyadi bisi baru. Tumbuh tekala nya.

Sida empat pan sama bela enda engkeretik siko, meda utai nyelaie nya. Enda kala peda sida empat ngelamatu. Bah dah nya saduai ia Lulong enggau Guntur berandau nyau tuchum tuchum meda ulah jegak mensia nyemayar ke nembiak ti rindu begagai bertundi enggau Bujang Liba sereta Uchu Pungga. Chapoh aja ke pagi nya laban sera nyawa anembiak mensia nyemayar ti ketawa engkakah ti rindu begagai enggau Bujang Liba saduai. Nyadi Legit Belit madah enti Bujang Liba ulih anang sekali sida ia ngasu ke Tuchung Bukit Perabung Menoa Mali laban ba din Raja Sintak Tedong ti ngempu menua.

Diak Bujang Liba madah auk aja sereta nanya ba Legit Belit Nemu Beduan, nama kebuah kampung puang kampung jerung nadai didinga jelu ko ia nanya Legit Belit.Diak Legit Belit madah semoa jelu nya belalai ari disumpit Bujang Liba ti nangkin ilang semengat antu enggau mensia sereta semengat utai idup ba dunya tu. Nya alai semua utai idup ba kampung puang sigi lari ari ditemu Bujang Liba, takut disumpit dipakai Bujang Liba. Diak Legit Belit ngemai sida agai endur jelu ti dinang sida ia ba kampung puang alu Legit Belit madah enti Bujang Liba, Guntur, Lulong enggau Uchu Pungga ka ngasu,tanah mesti ditempap ia tujuh kali ba peniki nyingkang kaki ke tanah alai ia ngasu ngica Legit Belit ulih ngelepau jelu utai dipinta Bujang Liba, Lulong, Guntur enggau Uchu Pungga ti ngiga dagin jelu.

Datai ba endur Bunsu manok, diak Legit Belit ngasuh Bujang Liba, Guntur, Lulong enggau Uchu Pungga milih kediri ni bagi manok ti ka dibunuh dipakai sida ia. Diak sida sabuat milih kediri empu meh tadi tang penyelai ia tiap kali sida nunjuk ni bagi manok ka dipakai ka dibai pulai tak bebesai manok nya nuju agai sida ia alu ngali kediri ba senentang bermua sida ia.

Datai ba sida Bujang Liba tadi diak manok tuai ngali kediri baka minta disayat sida Bujang Liba.Meda utai bangat ngemuntang nya diak Uchu Pungga alu nyayat senyayat ni bagi manok dipilih Bujang Liba, Lulong enggau Guntur.

Bisi bebelas iko manok besai disayat alu sida ia bado agi milih manok,alu menoa Bunsu jani kampung puang alu kenya ga jani tadi ni bagi dipilih disayat sigi mansang kediri agai sida Uchu Pungga alu ngali kediri minta disayat.Nyadi pengudah pulai ari kampung puang diak sida sabuat alu nyalai isi nya magang laban pagila sida sabuat ka pulai agai menua diri.Salai isi di intu bala Legit alu sida Guntur ngirup ai tuak enggau Legit sereta sida kabukai. Nyau malam ari nya baru sida tadi tindok ngemai pala tetengut palau.Tumu pagi Lulong dani alu ngerak Bujang Liba, Uchu Pungga enggau Guntur alu ngasuh sida ia nengkira pulai ke menua diri.Udah engkira diak sabuat terkenyit meda salai isi udah ditungkus enggau daun alu udah ditepu ba lanji sida sabuat tadi.

Pengudah nya sida alu pansut ari bilik penindok alu terkenyit meda Mensia Nyemayar ti berpantun beserara enggau sinu ati, diak sida Legit Belit merap Bujang Liba, Uchu Pungga enggau Guntur. Pia mega sida ka indu sama beberap enggau sabak ti sinu enggau penoh penyiru. Datai Legit Belit betusi enggau Lulong ,ia ngasuh Lulong nyaga Bujang Liba enggau manah sereta anang ngelaban jako Bujang Liba laban mina Bujang Liba aja ulih beridup enggau sida ia.

Diak Legit Belit sereta bala ia kabukai alu ngaga sempekat, semaya enggau sumpah. Naka ia meh tu kitai betemu sereta begulai, ditu aku madah ka kitak. Enti kitak meda kami sebelah tanah, kayu, batu enggau selepak utai bukai. Kitak anang munoh kami pia aja, bunoh meh enggau sampi sereta tuboh kami ke udah nyadi ai tauka baka kena tutok kitak. Tau disimpan, nyangka kitak bisi puni, nyangka kitak bisi kena ludah, kena ketup, kena sengat, tuboh kami tu ulih nyadi ka ubat sengat, ubat pisa. Unsut ka ba abi ka kena enggau sampi. Nangka ia meh kitai begulai ditu, enggai kitak puni kitak tau nyebut leka sampi tu " Dah Ki, Ki Nik". Pia meh sampi enggai ka puni unggal ko Legit Belit bejako, ngangau ka sida ia Unggal. Sapa sapa kami knyengat kitak, nya meh bunuh kitak nyadi ka ubat.

Diak sida ia beserara agi meh berandau, laban Legit agi bisi utai dikerandau. Diak Legit bejakobaru kami ditu semampai ingat belama ke sangkung kitak anak mensia, diak sida Legit Belit alu lesap, nadai dipeda agi.

-----------------------------------------------------------------------------------------------------------------------------------------------------

" Nyadi aku maie kitak ngenang penemu ke kala nyadi ba aku pan kala disengat nyemayar api panjai mesai tunjuk. Alu di tepis ka aku, alu bunoh. Sereta dilumat ka aku ba batu, nyadi udah nya disampi ka aku tubuh sida nyuman ka betis aku kena sengat nyemayar api, datai ka saharitu bekau sengat nya agi megkang ba betis aku. Nyadi penemu bakatu, kala diambi mimpi. Sampi ia munyi tu " bado nuan udah tu deh, anang ngacau aku, nadai puni, pisa sengat alah, aku menang ". Nya aja, alu unsut bekali kali, tau diuji. Semina anang nguji diri kena sengat nadai kabuah. Sigi nya aja meh ulih dikunsi aku enggau semua kitak pemacha ditu, utai bukai sereta lebih nya ngiga kediri meh auk. 

Kitak ka bisi niat bisi utai pinta ka besai, tau nguji, anang takut niki katas tuchung bukit.

Bai ka piring enggau perengka tauka tengkira. Udah bulih, anang enda ingat malas ia.

Pita meh utai ka manah manah, anang lari. Enggai ka nuan kena sumpah antu nadai bulih utai ba taun nya, nadai bulih, anang putus asa nguji baru, nampok ba endur bukai tauka diak baru, enda milih dini endur sebelah tuchung bukit, alai endur tauka ba kaki bukit, ka nama utai peda nuan, anang lari, utai ngerayap sebelah tuboh, anang nrmpis, anang munoh. Lak ka aja, utai datai utai mansang, alu terauh pinta ka pengaroh, pinta ka niat, bakanya nuan bebiau besampi, bakanya nuan bejako utai ka sebut nuan. Anang mayuh utai sebut aja, maya nuan beniat, enggai ka puni, nyangka utai nadai dibaie nuan nya tau ngasoh nuan puni. Enti nadai anang nyebut. Enti ia lama ayan diak, ngau mayuh penemu nuan besampi, nuan tau nyintak duku munuh ia, nyangka bisi ukor antu, bisi diambi mimpi. Nya aja, minta ampun enti jako aku bisi salah enda manah dinga. 

Bah nya aja bakih, ila aku nampung baru tusun ka 18.

#TerimaKasihAriAku

#KenangLemambang@SarawakDayaks

#kenang-lemambang.blogspot.com

Baruh tu semina gambar pengias aja.